Александар Тарабунов го објави музичкиот спот за својата нова песна „Француски вагони“, со што уште еднаш ја потврдува својата позиција како еден од ретките домашни музичари што целосно стојат зад сопствениот креативен израз.
Песната, која беше промовирана на големиот христијански празник Богојавление – Водици, е целосно авторско дело на Тарабунов. Тој ги потпишува текстот, музиката и аранжманот, а учествувал и во комплетната продукција – од вокалите до финалниот звук.
„‘Француски вагони’ ви ја подарувам на овој голем ден – Богојавление (Водици). Бидете во добро здравје, дисциплина и љубов. Секогаш ваш“, напиша Тарабунов на Instagram, најавувајќи ја песната пред својата публика.
Во музичкиот спот, кој визуелно ја надополнува атмосферата и симболиката на песната, се појавува моделот Тамара Трајковска. Видеото е естетски сведено, со акцент на емоцијата и пораката, без непотребна наративна наметливост.
За процесот на создавање, Тарабунов открива дека песната настанала спонтано и интензивно:
„Песната ја направив за една недела – музиката, текстот, аранжманот, придружните вокали, главниот вокал, продукцијата – сѐ. Инспирацијата дојде природно, без конкретна идеја. Едноставно ѝ дозволив на песната самата да ме води, а и насловот се појави сам и носи порака што се открива на крајот.“
„Француски вагони“ доаѓа по синглот „Љубов“, објавен кон крајот на 2025 година, кој Тарабунов го опиша како своја најинтимна, најзрела и најкомплетна песна досега. И новото остварување продолжува во истиот емоционален и зрел тон, но со современ звук и поинаква симболика.
Песната испраќа порака за враќање кон суштинските вредности – помал фокус на материјалното, повеќе слушање на срцето, искреност во чувствата и човечност во односите.
Со силна емоција, модерен продукциски пристап и внимателно изграден визуелен идентитет, „Француски вагони“ се издвојува како уште еден значаен чекор во авторската еволуција на Александар Тарабунов.
Comments are closed.