Во свет каде што првиот впечаток често е само површина, а професиите се заробени во строги правила, д-р Маја Ангелеска Викторијоски е жена што ги руши сите стереотипи. Педијатар-неонатолог по призвање, доктор кој работи со најмалите пациенти, а истовремено личност што со леснотија и храброст го црта својот пат – во професијата, во стилот и во животот.
Маја е препознатлива по стручност, смиреност и човечност. Но надвор од болничките ѕидови, таа е модна појава што не чека одобрување – со руса коса, геометриски прецизни шишки и комбинации што зборуваат за самодоверба, а не за тренд.
„Не се водам по тоа како ‘треба’ да изгледам на мои години. Ги носам работите што мене ми стојат и во кои се чувствувам добро. Понекогаш се храбри, понекогаш неутрални, но секогаш – мои.“
Стил што зборува сам за себе
За Маја, модата не е само облека – тоа е интимен дијалог со себеси. Од моторџиски чизми и кожни јакни со урбан дух, до лежерни летни комбинации и елегантни капути – секој стајлинг носи лична приказна.
Накитот е задолжителен, очилата и чантите се нејзините омилени парчиња, додека штиклите ги носи ретко. Некои парчиња ги облекува само еднаш, други ги чува години.
Зад фасадата – срамежлива личност
Иако надворешно делува силно и самоуверено, Маја признава дека е внатрешно срамежлива. Не ѝ треба одобрување од околината. Мал круг пријатели, време со семејството, рутина со сестра ѝ – тоа ѝ е најважно.
„Коментарите на луѓето што не ме познаваат не ме допираат. Тие честопати погрешно ме перципираат како надмена, а всушност сум срамежлива и внимателна. Не ми треба одобрување за да живеам по свој пат.“
Наследен вкус и рана независност
Љубовта кон модата ја наследила од мајка си, која уште како млада кроела и создава комбинации за себе и семејството. Маја, пак, уште како тинејџерка знаела што сака – и никогаш не прифаќала компромис.
„Дури и кога сите носеа исти јакни и фармерки, јас купив сјајни сребрени парчиња. Модата за мене никогаш не била за бренд или цена, туку за идеја.“
Дамата не се дефинира со гардероба
„За мене, дамата ја прави однесувањето – љубезноста, ставот, културата. Гардеробата е само додаток.“
На работа носи униформа – професионално и ненаметливо. Надвор, стилот е нејзин начин да се изрази, без да се потчинува на туѓи очекувања.
„Кој сака да ме прифати – нека ме прифати, кој не – не мора ни да ме гледа. Стилот е моето ‘јас’.“
Животен баланс и мајчинство
Маја одржува линија и младоликост без екстреми – здрава исхрана, многу движење, јога и теретана. Како мајка на две ќерки, најважно ѝ е да им пренесе самопочит, независност и храброст да живеат според своите правила.
„Да не се водат од стереотипи, да не се потчинуваат, но и да не се наметнуваат. Кога жената е сигурна во себе – стилот доаѓа сам.“
Стилот, вели таа, е само видливата страна на внатрешната самодоверба. Кога човек е сигурен во себе, облеката станува продолжение на неговиот карактер, а не маска.
Be First to Comment