За да ја врати помладата публика и да го запре финансискиот пад, апликацијата „Тиндер“ започна со тестирање на нов концепт наречен „Групни дружења“. Наместо традиционалните состаноци во четири очи, новата опција нуди спојување на групи за заеднички активности.
Корисниците сега можат да одберат конкретна активност (како на пример, куглање) и да формираат тим од најмалку тројца пријатели. Нивниот заеднички профил потоа се нуди на други групи со слични интереси. Доколку дојде до взаемно допаѓање меѓу барем двајца членови од различните групи, автоматски се отвора групен чет за договарање на средбата, со можност за напуштање на разговорот во секој момент.
Идејата на компанијата е да го намали притисокот и нелагодноста од класичните соло состаноци со непознати, нудејќи им на младите поопуштен и поприроден начин за запознавање во друштво.
Овој потег директно произлегува од послабите финансиски резултати. Во вториот квартал, приходите на „Тиндер“ се намалија на 457 милиони долари, а бројот на дневно активни корисници бележи пад од четири отсто. Преку овој концепт, кој првично се тестира во САД и неколку други земји, компанијата се надева дека ќе ја надмине заситеноста на корисниците и ќе го освежи интересот пред глобалното лансирање.
Comments are closed.