Бидејќи содржините генерирани со вештачка интелигенција стануваат сè пореални и речиси невозможни за препознавање со голо око, Google официјално ја отвори за јавноста својата напредна алатка SynthID Detector. Станува збор за бесплатен сервис кој на секој корисник му овозможува лесно да провери дали одредена фотографија, аудио или видеосодржина содржи специјален дигитален воден жиг што открива AI-потекло.
Постапката е исклучително брза и едноставна – потребно е само да се прикачи саканата датотека, по што алатката го скенира материјалот за присуство на невидливиот воден жиг. Иако интерфејсот засега функционира на англиски јазик, платформата е достапна за корисници ширум светот.
Технологијата на Google работи така што при самото создавање на содржината вградува суптилен сигнал кој е невидлив и нечуен за луѓето, но лесно се чита со соодветен софтвер. Од 2023 година досега, овој воден жиг е вграден во повеќе од 180 милијарди слики и видеа, како и во илјадници часови аудиосодржина.
Она што е особено важно е дека алатката не проверува само содржини генерирани преку производите на Google. Таа препознава и содржини создадени преку водечки партнери како што се OpenAI, NVIDIA и Kakao, додека најавена е поддршка и за алатките на Apple во иднина.
Сепак, експертите посочуваат на одредени ограничувања. Детекторот не може прецизно да утврди дали станува збор за целосно генерирана содржина или само за оригинална снимка дообработена со AI-алатки. Исто така, отсуството на овој жиг не гарантира дека содржината е 100% автентична, бидејќи сè уште не постои глобален стандард што го користат сите AI-компании.
Алатката засега е специјализирана само за визуелни и звучни формати, односно проверката на обичен генериран текст не е поддржана.
Comments are closed.