МОН И СОЈУЗОТ НА ПРОСВЕТНИ РАБОТНИЦИ ГИ ПРОГЛАСИЈА 13-ТЕ НАЈДОБРИ НАСТАВНИЦИ ЗА ОВАА УЧЕБНА ГОДИНА

По повод 5 Октомври, Светскиот ден на учителите, Сојузот на просветни работници и Министерството за образование и наука (МОН) доделија признанија на тринаесет најистакнати воспитувачи и наставници за учебната 2025/2026 година. Настанот се одржа под мотото „Учителот инспирира, ученикот создава – заедно го обликуваат светот на знаењето“, со цел да се валоризира трудот, посветеноста и професионалноста на просветните работници.

Признанијата беа доделени во неколку категории. Во предучилишното образование наградена е Клементина Петрушевска од детската градинка „Весели цветови“ во Кисела Вода. За одделенска настава признанија добија Соња Трифуновска од ОУ „Гоце Делчев“ во Тетово, Виолета Поповска од ОУ „Вера Јоциќ“ во Гази Баба, Габриела Мерџаноска од ОУ „Гоце Делчев“ во Гостивар, Ксенија Николова од ОУ „Гоце Делчев“ во Босилово и Весна Тодоровска-Унковска од ОУ „Партенија Зографски“ во Кисела Вода.

Во категоријата за предметна настава наградени се Томе Китановски од ОУ „Гоце Делчев“ во Василево, Бојанка Џипунова-Ташова од ОУ „Васил Главинов“ во Велес, Вера Зороска од ОУ „Христо Узунов“ во Охрид, Оливера Шиклеска-Грозданова од ОУ „Ѓорѓи Сугарев“ во Битола и Благица Чатлеска од ОУ „Гоце Делчев“ во Прилеп. За средно образование признание доби Никола Делевски од РЦСОО „Никола Карев“ во Струмица, додека постхумно признание му беше доделено на професорот Слаѓан Станковиќ – Битрак од СОУ „Наце Буѓони“ во Куманово и МИГ во Скопје.

Наградите ги врачија министерката за образование и наука Весна Јаневска и претседателката на Сојузот на просветни работници, Жаклина Ристовска. Министерката Јаневска порача дека просветните работници се клучниот столб на општеството и најави ново зголемување на платите за март, надоградувајќи го веќе остварениот раст од 20 отсто во изминатите две и пол години. Таа нагласи и дека министерството активно презема чекори за надминување на дефицитот на наставен кадар по природните науки и за враќање на општественото достоинство на професијата.

Претседателката на Сојузот, Жаклина Ристовска, подвлече дека во време на забрзан технолошки напредок и подем на вештачката интелигенција, суштинската улога на учителот останува незаменлива, тој е оној кој ја буди љубопитноста, ги препознава потенцијалите и ја гради самодовербата кај учениците.