Случајот што ја потресе македонската јавност добива уште помрачна димензија. Осомничениот за серија напади врз жени во кумановскиот регион сега се товари за уште четири тешки кривични дела – две убиства и два обиди за убиство.
Обвинителот Љубомир Лапе на денешниот брифинг со новинарите изјави дека истрагата се проширува и дека случајот веќе се третира како прв серијски убиец во Македонија со елементи на фемицид.
СИТЕ ЖРТВИ БИЛЕ ЖЕНИ – ОБВИНИТЕЛСТВОТО ГОВОРИ ЗА ФЕМИЦИД
Според обвинителството, заедничко за сите случаи е што жртвите биле жени, најчесто повозрасни и живееле сами.
„Се работи за прв случај на сериски убиец со елементи на фемицид, бидејќи сите жртви биле жени и биле нападнати токму поради нивниот пол“, изјави обвинителот Лапе.
Ова отвора сериозни прашања за безбедноста на жените во руралните средини, но и за тоа дали претходно биле пропуштени сигнали што можеле навреме да алармираат за опасноста.
ОД СИТНИ КРАЖБИ ДО СОМНЕЖ ЗА СЕРИЈА УБИСТВА
Осомничениот, 25-годишниот Трајко Б. од селото Малотино во општина Старо Нагоричане, моментално се наоѓа во затвор во Куманово.
Според информациите од истрагата, тој претходно бил познат по ситни кражби, кражба на автомобил и други кривични дела. Жителите на селата сведочат дека често се движел со велосипед низ околните населени места и бил познат како проблематична личност.
Дополнително внимание привлекува фактот што бил активен и на социјалната мрежа TikTok, каде често објавувал содржини.
БРУТАЛНИ НАПАДИ ВРЗ СТАРИ ЛИЦА
Случајот првично бил отворен по убиството на 78-годишна жена од Старо Нагоричане, која живеела сама. Таа била претепана и задушена со перница, а постојат индиции дека сторителот ја ограбил.
Претходно, 86-годишна жена од Челопек успеала да преживее напад во својот дом. Според нејзиното сведочење, напаѓачот ѝ фрлил ќебе преку главата и почнал да ја дави.
Жената била спасена случајно, откако напаѓачот слушнал шум и избегал.
СЕ ПРОВЕРУВААТ И СТАРИ СМРТНИ СЛУЧАИ
Истрагата сега се проширува и на уште неколку сомнителни смртни случаи.
Според информациите, се преиспитуваат вкупно пет смртни случаи – три од оваа година и два од минатата. Заедничко за сите е што жртвите биле жени кои живееле сами и биле пронајдени мртви во своите домови.
Во дел од случаите, првично не била побарана обдукција бидејќи немало очигледни траги на насилство.
ЌЕ СЕ БАРА И ЕКСХУМАЦИЈА
Обвинителството веќе најави дека ќе бара ексхумација на телото на 37-годишна жена, чија смрт претходно била заведена како последица од прекумерна употреба на алкохол.
Но, локалното население уште тогаш се сомневало дека околностите биле сомнителни.
СТРАВ И НЕСИГУРНОСТ ВО СЕЛАТА
Старо Нагоричане, Челопек, Драгоманце и Клечовце се местата каде што се случувале нападите.
Жителите велат дека со месеци владееле страв и неизвесност, особено кај жените кои живеат сами.
СЛУЧАЈ ШТО ГО ШОКИРА РЕГИОНОТ
Доколку сомнежите се потврдат, Македонија би можела да се соочи со еден од најтешките случаи на сериски убиства во поновата историја.
Истрагата продолжува, а јавноста очекува одговори – дали институциите можеле порано да реагираат и дали некои од жртвите можеле да бидат спасени.
Comments are closed.