Македонскиот маратонец и олимписки учесник Дарио Ивановски откри интересна анегдота од своите почетоци, кога како 18-годишник освоил бик на атлетска трка во Кичево и го продал за да купи автомобил.

Македонскиот олимписки маратонец Дарио Ивановски е познат по рекордите, медалите и успесите на меѓународната сцена. Но, зад неговата успешна кариера се кријат и интересни приказни од почетоците, кога секоја победа имала посебно значење.

Во гостувањето кај Стефан Лазаров, Ивановски откри анегдота што ги насмеа гледачите – како на само 18 години победил на улична трка во Кичево, а наместо парична награда добил… жив бик.

„Ме прашаа дали ќе трчам со бикот или за бикот“

Дарио низ смеа раскажува дека на почетокот не можел да поверува дека наградата навистина е бик.

„Кога ми рекоа: ‘Ќе трчаш за бик’, ги прашав: ‘Стварно бик? Со бикот ќе трчам или за бикот?’ Ми рекоа – за бик“, раскажа тој.

Трката била дел од традиционална манифестација во Кичево, каде покрај спортските натпревари се организирале и народни игри, а наградите биле сосема поразлични од денешните.

Автомобилот бил неговата најголема желба

Во тоа време Ивановски штотуку станувал полнолетен и размислувал како да заработи доволно пари за да си купи автомобил.

Претходно веќе победувал на неколку улични трки, а првите заработени пари биле вистинско богатство за него.

„До тогаш одев на тренинг со 50 денари во џеб, а одеднаш заработив околу 300 евра за неколку викенди. За мене тоа беа многу пари“, се присети тој.

Бикот го претворил во автомобил

По победата во Кичево, Дарио го добил бикот како главна награда. Наместо да го задржи, решил да го продаде и со тие пари да го оствари својот сон.

Така необичната спортска награда се претворила во првиот чекор кон купување автомобил.

Од улични трки до Олимписките игри

Денес Дарио Ивановски е најуспешниот македонски маратонец, национален рекордер и олимписки учесник, но не заборава од каде почнал.

Неговата приказна е потсетник дека зад секој голем успех стојат години работа, упорност и необични моменти кои подоцна стануваат најубавите спомени.