Повеќе од две и пол години по исчезнувањето на двегодишната Данка Илиќ во Бањско Поле, денеска во Вишиот суд во Неготин започна судењето против Дејан Драгијевиќ и Срѓан Јанковиќ. Двајцата се обвинети за тешко убиство на девојчето, за што Обвинителството бара доживотен затвор.
Обвинетите, вработени во локалниот „Водовод“, беа спроведени со лисици на рацете на подготвителното рочиште, каде за првпат очи в очи ќе се соочат со родителите на Данка.
Случајот кој го потресе Балканот во март 2024 година сè уште е полн со контроверзи. И покрај масовната потрага (вклучувајќи хеликоптери, кучиња трагачи и активирање на системот „Пронајди ме“), телото на девојчето никогаш не е пронајдено. Ова е огромен проблем за Обвинителството, бидејќи нема форензички докази.
Дополнително, двајцата обвинети кои првично го признаа делото (дека ја удриле со автомобил, а потоа ја убиле), подоцна ги повлекоа исказите. Тие тврдат дека признанијата биле изнудени со брутална полициска тортура, удирање и потопување глави во вода.
Истрагата ја одбележа уште еден скандал. Далибор Драгијевиќ, братот на Дејан (уапсен за помагање), почина во полициска станица три дена по апсењето. Медиумите објавија дека обдукцијата покажала знаци на брутално тепање, случај кој сè уште не е расчистен од внатрешната контрола на МВР.
Останува да се види дали судот ќе успее да докаже убиство без пронајдено тело и дали конечно ќе се дознае вистината за судбината на малата Данка.
Comments are closed.