Министерот Сашо Клековски наложи вонреден инспекциски и стручен надзор по случајот со 19-годишната Станка Михајлова, која останала неподвижна по царски рез во Штип. Ќе се утврдува дали има лекарски пропуст.

Министерот за здравство Сашо Клековски наложи вонреден инспекциски и стручен надзор по случајот со 19-годишната Станка Михајлова од струмичкото село Баница, која по царски рез во Клиничката болница во Штип останала со параплегија и денес се движи со инвалидска количка. Надзорот треба да утврди дали при лекувањето бил направен медицински пропуст.

photo credits: Слободен печат

Случајот предизвика силни реакции во јавноста, откако семејството на младата мајка јавно побара институциите да ја испитаат причината за нејзината здравствена состојба.

Ќе се проверуваат три болници

Министерот Клековски потврди дека Државниот здравствен и санитарен инспекторат ќе спроведе вонреден надзор во сите три здравствени установи каде што Станка Михајлова била лекувана.

Покрај инспекцијата, ќе биде формирана и стручна комисија составена од специјалисти по гинекологија, неврологија и урологија, која ќе треба да утврди дали при породувањето или последователниот третман дошло до евентуален лекарски пропуст.

Семејството тврди дека сè започнало по царскиот рез

Според медицинската документација со која располага семејството, Станка Михајлова се породила со втор царски рез на 26 јуни годинава во Клиничката болница во Штип.

Во отпусното писмо било наведено дека пациентката е испишана „во добра општа состојба“.

Но, семејството тврди дека реалноста била сосема поинаква.

Свекорот Велибран Стојанов вели дека младата жена не можела самостојно да оди уште при напуштањето на болницата и дека била изнесена со помош.

Според неговите зборови, само два дена пред породувањето немала никакви проблеми со движењето.

На Клиниката за неврологија констатирани сериозни промени

Неколку дена подоцна, на 4 јули, Станка била транспортирана со Итната медицинска помош во Клиниката за неврологија во Скопје.

Во медицинскиот извештај е наведено дека по породувањето со спинална анестезија пациентката се жали на слабост на двете нозе, отежнато одење и уринарна ретенција.

Магнетната резонанца покажала миелопатски промени на ниво на Th9-Th11, односно во пределот на градниот дел од ‘рбетниот столб.

Директорот на штипската болница: „Првпат слушам за случајот“

Директорот на Клиничката болница во Штип, Владко Захариев, изјавил дека за случајот дознал преку медиумите.

Тој ги повикал членовите на семејството официјално да поднесат претставка и да ја достават целокупната медицинска документација, по што болницата ќе ги разгледа сите околности.

Истрагата треба да даде одговори

Во јавноста се појавија и различни тврдења околу можната причина за компликацијата.

Според семејството, една лекарка посочила дека можно е состојбата да е поврзана со анестезијата, но засега нема официјална потврда за тоа.

Токму затоа, стручниот надзор и инспекциската постапка треба да утврдат што точно довело до тешката здравствена состојба на младата мајка и дали при лекувањето биле испочитувани сите медицински протоколи.