Три лица – еден маж и две жени – загинаа во тешка сообраќајна несреќа на патот меѓу Скопје и граничниот премин Блаце. Тие биле пронајдени во превртен автомобил „мерцедес“ со германски регистарски таблички, откако претходно биле пријавени за исчезнати.
Според информациите од Министерството за внатрешни работи, несреќата била пријавена во неделата околу 22:35 часот, кога полициски екипи од СВР Скопје излегле на местото на настанот.
Во превртеното возило биле пронајдени едно машко и две женски лица без знаци на живот. Лекар од Итната медицинска помош ја констатирал смртта на сите тројца.
Претходно биле пријавени за исчезнати
Истиот ден, околу 13:40 часот, државјанин на Косово пријавил во Полициската станица Бит Пазар дека три лица се исчезнати.
Според неговата пријава, последниот контакт со нив бил во саботата околу 22:15 часот, кога се наоѓале на Меѓународниот аеродром Скопје.
Жртвите се државјани на Косово
Според информациите објавени од телевизијата Алсат, тројцата загинати се државјани на Косово.
Наводно, две од лицата биле преземени од скопскиот аеродром, по што со возилото се упатиле кон Косово. Несреќата се случила пред да стигнат до граничниот премин Блаце.
Пред нивното пронаоѓање, семејствата преку социјалните мрежи и медиумите апелирале за помош во потрагата, бидејќи со нив немале контакт од саботата вечерта.
Истрагата е во тек
Надлежните институции работат на утврдување на причините за несреќата и на сите околности под кои дошло до превртување на возилото.
Полицијата најави дека по завршување на истрагата ќе бидат соопштени повеќе детали.
Comments are closed.