Таткото на 17-годишната Надица, која загина во пожарот во дискотеката „Пулс“ во Кочани, со потресни пораки на социјалните мрежи ја чува нејзината меморија и испраќа силни пораки за љубовта, болката и правдата.
Пет месеци по трагедијата во Кочани, болката на семејствата кои ги загубија своите најблиски не стивнува. Меѓу нив е и Александар Наунов, таткото на 17-годишната Надица, која го загуби животот во пожарот во дискотеката „Пулс“. Преку емотивни објави на социјалните мрежи, тој секојдневно ѝ се обраќа на својата ќерка, претворајќи ја неизмерната тага во зборови што допираат до илјадници луѓе.
„Секој ден без тебе е потсетник колку ни недостигаш“
Во своите објави, Александар зборува за празнината што останала по загубата на Надица и за љубовта која, како што вели, никогаш нема да згасне.
„Секој ден без тебе е тивко потсетување на тоа колку длабоко те сакаме и колку ни недостигаш. Твојата насмевка, твојата енергија, твоите соништа сè уште одекнуваат во секој агол од нашиот живот. Имаше само 17 години, но во тие 17 години живееше со срце полно со љубов, добрина и светлина“, напиша тој.
Во друга објава додава дека често погледнува кон небото, верувајќи дека неговата ќерка и понатаму сјае.
„Понекогаш гледаме во небото и се прашуваме што ќе беше денес, но знаеме дека таму каде што си, блескаш како ѕвезда.“
„Тоа не беше несреќа“
Александар не ја крие ниту својата болка и револт поради трагедијата во која животот го загубија 62 млади лица.
Во една од најпотресните пораки пишува:
„62 деца замолкнаа засекогаш. Во една ноќ полна со музика, смеа и младост, 62 млади животи беа украдени… Тоа не беше судбина. Не беше несреќа. Беше резултат на немарност, алчност и трул систем кој не ја штити младоста.“
Тој додава дека родителите останале со празни домови, прекинати соништа и прашање што, како што вели, ќе го поставуваат до последниот здив:
„Зошто никој не ги заштити нашите деца?“
Порака до помалата ќерка Ангела
Во една од своите објави, Александар ѝ се обраќа и на помалата ќерка Ангела, која активно учествуваше во маршевите и протестите по трагедијата.
Тој ѝ порачува никогаш да не ја заборави својата сестра и да продолжи да биде нејзин глас.
„Во тој мрак, ти избра да станеш. Да излезеш на улица. Да бидеш глас за неа, за сите нив, за сите нас. Гледајќи те таму, видов надеж. Видов сила. Видов како љубовта што ја имавте прерасна во храброст.“
Во продолжение додава:
„Никогаш не ја заборавај сестра ти. Носи ја со тебе – во срцето, во зборовите и во постапките. Ќе живее преку тебе, преку нас и преку сè што правиме светот да стане подобар.“
Болка што не згаснува
Пожарот во дискотеката „Пулс“ засекогаш ги промени животите на десетици семејства. За Александар Наунов, сопругата Габриела и нивната ќерка Ангела, секој нов ден е потсетник на загубата на Надица.
Неговите објави не се само лични писма до ќерката што ја нема. Тие станаа симбол на родителската љубов, но и потсетник дека зад бројките и статистиката стојат човечки судбини, прекинати соништа и семејства кои и понатаму живеат со болката од една од најголемите трагедии во поновата македонска историја.
Comments are closed.