Околу 80 семејства кои купиле станови во десеткатница во скопската населба Аеродром веќе повеќе од две години чекаат да се вселат во своите домови.
Иако рокот за примопредавање бил декември 2023 година, зградата сè уште не е завршена, а купувачите велат дека се принудени истовремено да отплаќаат станбени кредити и да живеат под кирија.
Станува збор за објект што се гради веднаш до поликлиниката „Јане Сандански“, чиј инвеститор е компанијата „Бауер БГ“. Според купувачите, изградбата трае веќе пет години, а и покрај повеќекратните ветувања, крајот сè уште не е на повидок.
Ветениот рок одамна помина
Група сопственици на станови за медиумите изјавиле дека во преддоговорите како рок за завршување бил наведен декември 2023 година. Оттогаш поминале повеќе од две години, а, како што велат, голем дел од предвидените работи сè уште не се реализирани.
Последната средба со инвеститорот ја имале во јануари, кога им бил презентиран нов динамичен план според кој зградата требало да биде завршена до средината на јули годинава. Сепак, купувачите тврдат дека роковите повторно не се испочитувани.
„Работат со неколку работници“
Според нивните сведоштва, на градилиштето секојдневно работат само неколку лица, што, според нив, не е доволно за објект со ваков обем.
Во доставениот план биле предвидени рокови за завршување на фасадата, поставување лифтови, молерски работи, подови, плочки, електроинсталации и приклучување на потстаницата за парно греење. Купувачите, сепак, тврдат дека голем дел од тие активности не се реализирани.
„Зградата изгледа како градилиште“
Според сопствениците, недовршени останале фасадата, подземните гаражи, водоводната и електричната инфраструктура, системот за парно греење, санитариите, лифтовите и голем дел од внатрешното уредување.
Тие велат дека зградата сè уште не ги исполнува условите за технички прием и стравуваат дека со сегашната динамика на работа ќе поминат уште години пред да можат да се вселат.
Финансиски товар за семејствата
Дополнителен проблем, велат купувачите, е тоа што многумина истовремено плаќаат месечни рати за станбен кредит и кирија за местото каде што моментално живеат.
Дел од нив се поранешни сопственици на објекти што биле урнати за изградба на новата зграда и тврдат дека инвеститорот им доцни со исплатата на договорената кирија веќе десет месеци.
Инвеститорот засега без одговор
До моментот на објавување на информациите, од компанијата „Бауер БГ“ немало одговор на прашањата поврзани со причините за доцнењето, бројот на ангажирани работници, како и евентуалниот нов рок за завршување на изградбата.
Ова не е единствен случај во Скопје. Во изминатиот период, слични проблеми пријавија и купувачи на станови во други станбени комплекси, каде што доцнат изградбата, техничкиот прием или приклучоците за основната инфраструктура.
Според важечката законска рамка, инвеститорите имаат рок од десет години да ја завршат изградбата од моментот на започнување на објектот, поради што купувачите сметаат дека постојните прописи не обезбедуваат доволна заштита за граѓаните кои навреме ги исполниле своите финансиски обврски.
Comments are closed.