Нов скандал со бесправно градење ја тресе Македонија, откако полицијата откри дека правно лице од Скопје, австриски државјанин и раководител од Гевгелија незаконски вршеле градежни работи кај Неготино, без да ги исполнат законските услови.
Според Министерство за внатрешни работи, осомничените ископале канал долг околу 600 метри и поставиле кабли за електрична енергија на потегот меѓу селата Пепелиште и Војшанци.
ГРАДЕЛЕ ПРЕД ДА ДОБИЈАТ ДОЗВОЛА
Истрагата покажала дека работите биле започнати пред да биде издадена градежна дозвола и пред да се плати надоместокот за уредување градежно земјиште.
Според информациите, станува збор за сума од над 1,5 милион денари што требало да биде уплатена кон Општина Неготино.
Од полицијата велат дека инвеститорот претходно поднел барање до општината, но и покрај тоа почнал со активности пред да ги добие потребните одобренија.
АВСТРИЕЦ И МАКЕДОНСКИ ДРЖАВЈАНИ ПОД КРИВИЧНА ПРИЈАВА
Кривичната пријава е поднесена против правно лице од Скопје, австрискиот државјанин В.М. како одговорно лице во компанијата и 52-годишен жител на Гевгелија, кој бил раководител на подружницата во Кавадарци.
Тие се сомничат за кривично дело „бесправно градење“ по член 244 од Кривичниот законик.
ДИВОГРАДБИТЕ ПРОДОЛЖУВААТ ДА НИКНУВААТ НИЗ ДРЖАВАТА
Случајот повторно ја отвора темата за неконтролираното градење и честите злоупотреби во градежниот сектор.
Иако институциите со години најавуваат засилени контроли, дивоградбите и понатаму никнуваат низ Македонија – од туристички зони, па сè до инфраструктурни проекти.
Особено загрижува фактот што во случајов станува збор и за поставување електрични кабли, што може да има и безбедносни последици доколку работите се изведуваат без надзор и дозволи.
ПОЛИЦИЈАТА И ОПШТИНАТА ГО ДОКУМЕНТИРАЛЕ СЛУЧАЈОТ
Неправилностите биле откриени на 13 мај од страна на полициски службеници од ОВР Неготино и градежен инспектор од Општина Неготино.
По извршениот увид било констатирано дека активностите биле започнати спротивно на законските процедури.
Comments are closed.