ДРЖАВНИ ИНСТИТУЦИИ НЕ ПРИЗНАЛЕ СРЕДНО ОБРАЗОВАНИЕ ОД СПЕЦИЈАЛНИ УЧИЛИШТА
Комисијата за спречување и заштита од дискриминација утврди директна дискриминација врз млади лица со попреченост кои биле одбиени од државна мерка за практикантство, поради тоа што нивните дипломи не биле третирани како завршено средно образование.
Случајот се однесува на девојка со пречки во развојот која завршила средно специјализирано образование, но не ѝ било дозволено да аплицира за мерката „Практикантство“ во рамки на оперативниот план за вработување.
ОДБИЕНИ ОД МЕРКИ ИАКО ИМАЛЕ ДИПЛОМИ
И покрај тоа што условот за аплицирање бил „најмалку завршено средно образование“, институциите ги одбиле кандидатите со образложение дека нивното образование се води како втор или трет степен, односно како незавршено средно образование.
Ова резултирало со нивно исклучување и од мерката за практикантство, како и од други поврзани права, како младински додаток.
КСЗД: СТАНУВА ЗБОР ЗА ДИРЕКТНА ДИСКРИМИНАЦИЈА
Комисијата утврди дека Министерството за економија и труд и Агенцијата за вработување направиле директна дискриминација врз основ на попреченост, образование и припадност на маргинализирана група.
Според КСЗД, државата не обезбедила еднаков пристап до мерките за сите граѓани, особено за лицата со попреченост.
ИНСТИТУЦИИТЕ БЕЗ ЕДНАКВА ПРАКТИКА
Во постапката било утврдено дека:
- Министерството не доставило одговор за случаите
- Агенцијата се повикала на класификација ISCED ниво 2
- лицата биле евидентирани како да немаат завршено средно образование
Ова, според Комисијата, довело до нееднакво третирање во системот.
НАЛОГ ЗА ПРОМЕНИ ВО РОК ОД 30 ДЕНА
КСЗД им наложи на институциите да ја запишат подносителката како лице со завршено средно образование и да ѝ овозможат учество во јавните повици.
Исто така, Агенцијата за вработување треба да ја усогласи праксата во сите подрачни единици и да обезбеди еднаков третман на сите лица со завршено специјализирано средно образование.
Comments are closed.