Иако две просечни плати во Македонија носат речиси 97.000 денари (просечната плата е 48.499 денари), вистинскиот животен стандард се мери според тоа колку пари им остануваат на домаќинствата по подмирувањето на основните трошоци.
Според податоците на Евростат, Македонија има најниско ниво на потрошувачки цени меѓу 36 европски земји, што е дури 45 проценти под просекот на Европската Унија. Сепак, тоа не значи автоматски дека граѓаните го имаат најмалиот финансиски товар, бидејќи бруто-домашниот производ по жител и приходите се значително пониски од европскиот просек.
Во однос на инфлацијата, ситуацијата се стабилизира и годишната стапка во септември изнесува 2,7 проценти. Цените растат побавно, но во нив веќе е вкалкулирана тежината на драстичните поскапувања од изминатите години, па затоа трошоците сè уште силно се чувствуваат. Во исто време, економијата бележи позитивни движења, со солиден раст на БДП од 4,3 проценти во второто тримесечје. Реалната нето-плата, која е коригирана за инфлацијата, пораснала за 4,7 проценти на годишно ниво, што укажува на подобрена куповна моќ на просечната плата.
На пазарот на труд, генералната невработеност изнесува 11,3 проценти, но таа останува високи 24 проценти кај младата популација. Дополнително, околу 21,9 проценти од населението живее во ризик од сиромаштија, што јасно потврдува дека економскиот раст сè уште не се распределува подеднакво кај сите.
Генерално, Македонија бележи позитивни макроекономски движења преку раст на економијата, зголемени плати и намалена инфлација. Сепак, статистичкиот просек не се чувствува исто во секое семејство. За трајно повисок животен стандард, неопходни се поголема продуктивност, поквалитетни и подобро платени работни места, како и поширока распределба на економските придобивки.
Comments are closed.