Едно од најпопуларните модни шоуа во светот, модната ревија на „Викторијас сикрет“, се врати во Лос Анџелес по цели 19 години и уште еднаш докажа дека знае како да приреди вистински спектакл! Овогодишното шоу ги спои носталгијата од деведесеттите и почетокот на милениумот со современите трендови, враќајќи ги на сцената легендарните Ангели, но и неколку нови, впечатливи лица.
Ревијата, тематски поделена по годишните времиња, ја отвори Бела Хадид во пролетна, цветна комбинација. Најголемо внимание, како и секогаш, предизвика враќањето на 45-годишната Адријана Лима, една од најомилените манекенки на брендот, која блесна во неон-зелено боди и нежнорозови цветни крилја, добивајќи ја честа да ја затвори ревијата.
Момент што предизвика силни емоции беше појавувањето на Барбара Палвин, која зачекори на пистата само шест недели по породувањето, бодрена од нејзиниот сопруг, актерот Дилан Спроус. Свое деби на модната писта имаше и Наталија Брајант, ќерката на покојниот Коби Брајант, која прошета во креација од младинската линија „Pink“.
Нов Ангел на брендот стана Соланж Омон, 21-годишна манекенка од Камерун, избрана по долга потрага низ САД, додека апсолутен хајлајт на вечерта беше дебито на Кајли Џенер. Таа ја имаше честа да го врати култниот луксузен градник („The Fantasy Bra“) на пистата по осумгодишна пауза. Градникот, дизајниран во соработка со „Jacob & Co.“, е украсен со жолт дијамант од 75,54 карати и чини неверојатни 50 милиони долари!
Настанот беше комплетиран со музички настапи на Тејт Мекреј, женската група „Катсaј“, Меган Ди Сталион и Меган Морони, правејќи од модната ревија вистинска комбинација на мода, забава и поп-култура.
Comments are closed.