Невиден интерес, паднати системи и 50.000 распродадени билети за само неколку часа – така изгледаше продажбата за концертот на Дејвид Гета во Скопје, кој ќе се одржи на 8 септември во арената Национална арена „Тодор Проески“ по повод 35 години од независноста на Македонија.
250.000 ЛУЃЕ СЕ ОБИДУВАЛЕ ДА КУПАТ БИЛЕТ
Според организаторите, над 250.000 корисници во ист момент се приклучиле на платформата за продажба, што предизвикало сериозни технички проблеми кај дел од посетителите.
Многумина на социјалните мрежи се жалеа дека со часови не можеле да се логираат или да ја завршат трансакцијата, додека други успеале да купат билети за само неколку минути.
БИЛЕТ ОД 35 ДЕНАРИ ЗА СВЕТСКА ЅВЕЗДА
Концертот предизвика огромно внимание и поради симболичната цена на билетите – само 35 денари, во чест на 35-годишнината од независноста на државата.
Со продажба на 50.000 билети биле собрани нешто помалку од 30.000 евра – сума која е далеку под реалните трошоци за настап на светска музичка ѕвезда од рангот на David Guetta.
Токму затоа, главното прашање во јавноста сега е: колку навистина ќе ја чини државата овој спектакл?
ВЛАДАТА СÈ УШТЕ НЕ ОТКРИВА КОЛКУ ЌЕ ЧИНИ КОНЦЕРТОТ
Иако концертот беше официјално промовиран досега нема официјални информации за целосната финансиска конструкција на настанот.
Не е познато:
- колкав е хонорарот на Гета
- колку ќе чини продукцијата
- колкав дел ќе се финансира од државниот буџет
- дали имало јавен повик за организација
Во претходните години ваквите државни настани често беа предмет на политички дебати токму поради трошењето јавни пари.
93% ОД БИЛЕТИТЕ ЗАВРШИЛЕ КАЈ МАКЕДОНСКА ПУБЛИКА
Интересно е што, според статистиката на организаторите, дури 93 проценти од билетите ги купиле посетители од Македонија, додека само 7 проценти биле продадени на странски гости.
Ова, според организаторите, покажува дека домашната публика била главниот двигател на огромниот интерес за концертот.
НАЈГОЛЕМИОТ МУЗИЧКИ НАСТАН ВО ПОСЛЕДНИТЕ ГОДИНИ?
Настапот на Дејвид Гета веќе се оценува како еден од најголемите музички настани што се организирале во Македонија во последната деценија.
Владата најавува „репрезентативна и модерна прослава“ на Денот на независноста, додека јавноста очекува одговори за транспарентноста и вистинската цена на спектаклот.
Едно е сигурно – Скопје на 8 септември ќе биде центар на регионалната музичка сцена.
Comments are closed.