Виница викендов не беше само домаќин на музички фестивал – стана нова меѓународна фестивалска дестинација. Второто издание на Cafe De Anatolia Festival собра посетители од Македонија, Индија, Германија, Швајцарија, Англија и други земји, претворајќи го источниот дел на државата во центар на Organic House сцената и покажувајќи дека македонски бренд може да привлече светска публика.
Втор фестивал од ваков тип во Македонија
Во „Александар Парк“ во Виница, во текот на два фестивалски дена, илјадници љубители на Organic House музиката уживаа во внимателно осмислена програма која ги обедини музиката, уметноста, гастрономијата, локалното вино и современата фестивалска култура.
На сцената настапија Beard2Beard, DR. Saba, Rex Stax, Jizabja, Keto Van Harum, Billy Esteban и Rialians On Earth, артисти препознатливи во Organic House заедницата, кои создадоа атмосфера по која Cafe De Anatolia е препознатлив низ светот.
Многу повеќе од музички фестивал
Покрај вечерните музички настапи, фестивалот понуди богата дневна програма со дегустација на вина од домашни винарии, гастрономски специјалитети, фестивалски маркет и современи уметнички инсталации.
Посетителите имаа можност да искусат пантомима, face painting, тарот читања, интерактивни перформанси и креативни инсталации кои создадоа препознатлива бохо атмосфера, претворајќи го фестивалот во целодневно културно и визуелно доживување.
Посетители од повеќе земји пристигнаа во Виница
Една од најголемите вредности на фестивалот беше неговиот меѓународен карактер. Голем број посетители специјално допатуваа во Македонија од Индија, Германија, Швајцарија, Англија и други држави за да присуствуваат на првото издание на Cafe De Anatolia Festival.
За многумина ова беше и прва посета на Виница и Македонија, што уште еднаш покажа дека музиката може да биде силен двигател на туризмот и локалната економија. За само еден викенд, Виница се најде на мапата на современите европски фестивалски дестинации.
Прв Car Expo во рамки на музички фестивал во Македонија
Годинешното издание донесе уште една новина – Car Expo, првата автомобилска изложба организирана во рамки на музички фестивал во Македонија.
Изложбата создаде интересен спој меѓу автомобилската култура, дизајнот и електронската музика, дополнително збогатувајќи ја фестивалската понуда и привлекувајќи публика со различни интереси.
Од македонска идеја до глобален музички бренд
Cafe De Anatolia е основан од семејството Илиеви – Зоран Илиев (Billy Esteban), Моника Илиева и Никола Илиев (Rialians On Earth).
Она што започна како македонски музички проект денес е еден од највлијателните Organic House брендови во светот. Организацијата соработува со повеќе од 5.000 артисти, располага со каталог од над 10.000 музички изданија, има повеќе од 30 милиони следбеници на дигиталните платформи и над две милијарди прегледи на своите содржини.
Брендот има административен договор со Sony Music Publishing, беше претставен на билбордите на Times Square во Њујорк, а доби и номинации од Beatport за признанијата „Label of the Year“ и „Artist of the Year“.
Што го прави Cafe De Anatolia Festival поинаков?
За разлика од голем број фестивали кои ја градат програмата околу лиценцирани светски брендови и гостински концепти, Cafe De Anatolia Festival беше целосно изграден околу сопствениот музички идентитет.
Целата програма беше составена од артисти поврзани со Cafe De Anatolia и музика од сопствениот каталог, овозможувајќи им на посетителите да го доживеат оригиналниот звук на брендот во неговата автентична форма.
Токму оваа автентичност, комбинирана со внимателно осмислена продукција, визуелен идентитет и мултимедијално искуство, го издвојува фестивалот од традиционалните музички настани во регионот.
Organic House продолжува да расте
Organic House е музички жанр кој комбинира deep house ритми со етно инструменти, ориентални мелодии, акустични звуци и амбиентална електронска продукција. Во последните години жанрот бележи значителен глобален раст, а Cafe De Anatolia е еден од брендовите што има клучна улога во неговата меѓународна афирмација.
Со успешната организација на првото големо издание, фестивалот постави темели за настан кој има потенцијал да прерасне во традиционален меѓународен фестивал, привлекувајќи публика од Балканот, Европа и пошироко, истовремено промовирајќи ја Македонија како атрактивна дестинација за музички и културен туризам.
Comments are closed.